الشيء اللي بتشوفه سهل وارد يكون بيقطم ضهر غيرك، والموقف اللي أنت مقتنع إنه مايستحقش الزعل هتلاقيه مبهدل حد ماتعرفوش نفسياً.. والسبب؟.. إحنا مختلفين.. نظرتنا للأمور وحكمنا عليها مختلفة، قدرة تحملنا مختلفة، تعاملنا مع المواقف مختلف، تأثير الظروف علينا مختلف، وردود أفعالنا مختلفة..فيه اللي بيستحمل مليون خبطة، وفيه اللي من خبطة بينخ.. لا الأولاني بطل خالي من الخدوش رغم اللي مر بيه، ولا التاني خيخة وضعيف ومش هيرجع بكره قوى.. مش مطلوب من الكل للكل غير شوية “لُطف” و”استيعاب” يهونوا الأمور، ويسهلوا الصعب، ويساعدوهم يكملوا.
