شارك البودكاست

مش مسامح حسين الحلقة الأولى – أجيال بتسلم أجيال

………………………………………………………

#مش_مسامح_حسين

 بطولة: سامح حسين

فكرة وتأليف: حسام ابراهيم

رسومات: منار عادل

فيديو جرافيك : محمد أسامة

مونتاج : حمدي الشربيني – مها طه

موسيقى : محمد ابو النجا

هندسة صوتية: أحمد كمال

مستشار فني: احمد خالد سليم

رؤية فنية وإخراج : محمد التابعي

………………………………………………………………………

الكلمات :

أجيال بتسلم أجيال ..

والدنيا بتعرض أفلامها وكله بيتفرج

وماحدش بيبات في السيما

يدوبكش الفيلم بيخلص

كله بيمشي

الجد بيتعب فجأة يومين ، وبيمشي

الأب بيتفاجئ إنه خلاص بقى جِد ، وقرّب يمشي

والطفل اللي بيحبي .. بيمشي

ويصبح بابا

وجدو

ودقة قديمة ..

اجيال بتسلم اجيال

ومابين الجيل والجيل فجوة

وسنين ضوئية بتفصل بين

فيديو التيك توك

وصوت بكار

وصباح الخير مع ماما نجوى ..

..

حلو التغيير

بس انا مش فاهم

هو ازاي طفل هيتعلم يكتب حرف الضاد

من غير سبورة وطباشير ؟

من غير ما يروح مدرسته الساعة تمانية الصبح

في أول يوم

شايل على ضهره الشنطة

ولابس لبس جديد ..

ازاي الطفل هيتعلم من غير أستاذ

يحترم العلم ازاي لو جاله بدون مجهود ، على شاشة قزاز

اه فعلا كل سلاح له بدل الحد ، اتنين

وعشان مشكلة تتحل .. هتحصل 100 مشكلة

النووي علاج .. ولكنه كمان ينفع قنبلة ..

والعربيات

مش عربيات من غير عادم ..

بس اللي غريب فعلا ومريب

هو انك سايب آلة تعلم طفل

ويكون بني آدم ..

الفجوة مابين الجيل والجيل بتزيد

وبقينا خلاص

لو بكرة هتفنا بلادي بلادي ماحدش فينا هيعرف إنه نشيد ..

انا وانت وهو وهي وكله .. بعيد

وماحدش فينا بيتمنى يقرب من إيد التاني

علشان كده كل الناس مابقتش بتفرح يوم العيد ..

امبارح مثلا

لو كان بيني وبينك ست سنين .. نقدر نتكلم

ونلاقي مابينا تفاهم حلو ورايق ..

دلوقتي محمد ماسك في احمد لما اتناقشوا في رأي معين

ماتفقوش

مع إن مابينهم ست دقايق ..

دلوقتي بنزعل ع اللي بيحصل في الأغنية

لما نكون ع القهوة ونسمع صدفة نجاة بتغني يا ليل ..

مش يمكن بعد سنين هنكون قاعدين على نفس القهوة بنسمع مهرجانات

ونقول

أياااام

كان فن جميل ..

العالم دلوقتي بيجري بسرعة

وعشان تجاريه

لازم رجليك تتحرك أسرع من رجليه

ولو انت بطيء

هتنضف كل تراب الأرض بوشك وانت مكلبش فيه

عاوز تتعلم كل علوم الدنيا ، اتعلم .. بس بسرعة

هتسلم ع الماشيين في الشارع ؟ سلم .. بس بسرعة

هتكلم صاحبك وتوده .. روح وده بسرعة

لو كنت جعان .. كل أكلة سريعة بسرعة

عطشان .. اشرب لك جرعة مية بسرعة

وساعتها يا صاحبي هينفع تسكن عصر السرعة

وتشب وتكبر فجأة بسرعة

وتحب وتقسى وتنسى بسرعة

لو كنت بطيء الدنيا هتفرم وشك

وهتخرج برة تراك الجري بأضعف كتف ..

وهتصحى الصبح تقول

أحيه !

انا شكلي لبثت سنين في الكهف ..

وماعدتش عارف تعمل ايه ..

هتحس ساعتها ان انت غريب من عالم تاني

وان انت دخلت ما بين الناس غلطة ..

مش لايق طعمك ع الخلطة

لا بقيت تتأثر بالاحداث

ولا بتأثر

العالم عمره ما وفّق ولا هيوفّق أبدا بين .. ناس من زمنين

والفجوة ما بين سامح وولاده هتفضل واسعة

زيها زي الفجوة اللي بقالها سنين

موجودة ما بين

سامح وحسين ..

Series Navigationالحلقة الثانية – السعادة >>
مش مسامح حسين