أخدناها من البداية، من اول الطريق ومن اول النهار
بلشت الحلقة بنزول شخص من المواصلات العامة للمجمع الرئيسي واكيد رح نمرق من الحسبة والرصيف بكل بساتطه وناسه
رح نسمع حنية الاذان بمسجد جمال عبد الناصر، نميز عراقة شارع ركب وكمان نشهد وقت الشاورما لكتير ناس
بعد ما خلصت فكرة وسط البلد والسوق ميلنا عرام الله التحتا لنشوف ابداعات اهل رام الله، اشغالهم اليدوية، هواياتهم واهتماماتهم وشو بحبو يشاركونا، وخلينا نكون صريحين؛ الحكي مش متل الشوف، لانو وقت بتنزل عسوق الحرجة بنلاقي الكل مبسوط وباكل وبزقف وبشتري وحامل كياس وبتشارك وقت ثمين مع اصحابهم!
طرنيب، تركس وزهر اكيد الهم مكانهم عند اهل رام الله بالذات مع كاسة الشاي بالقهوة عالشارع، واحاديث عن كل شي بيخطر على بالك وبين اجيال مختلفة..
ومن هون، السهره من كراج ومن كتير اماكن تانية بتقدر تلتقي بكتير ناس وتتعرف على شباب وصبايا عم بختارو يقضو نهاية الاسبوع بطريقتهم الخاصة او ممكن عن بحتفلو بمناسبة او حتى بلا مناسبة، عم بحتفلو بحالهم ببساطة.
وآخر الليل بتمشي ادور على ترويحة توصل بيتك .. بس قول يا رب ما تجي كبسية عشوفير الباص!
إنتاج وتسجيل: فراس ابو هيبة
هذا البودكاست ضمن منح راديو أثير للإنتاج الصوتي الممول من الاتحاد الأوروبي ومعهد غوته.
- هوية صوت – حلقة رام الله
