في تربية العيال، اللي بيسمع كلام أهله دايما عبيط! – يوميات واحدة ست

تربية العيال

العيال مابتسمعش الكلام وانت عايز العيال تسمع الكلام ليه دا ضد المنطق

أول ما خلفت ولادي البنتين الكبار – قلتلكم يمكن قبل كدة ان عندي اربع أولاد بنتيني وولدين

لكن بحكم ان البنات الأكبر والفرق العمري بينهم سنتين فتقريبا بدأت ف تربيتهم سوا  .. قلت لنفسي جملة بفتكرها لغاية دلوقت مش عايزة أربي ولادي زي ما اهلي ربوني ،، مش لاني مش عاجباني تربيتي ..لا خالص بالعكس انا اتربيت وكبرت  عندي اخلاق مبغشش حد بتحمل المسئولية وبحافظ على الأمانة وبجتهد حتى أستحق  لكني مكنتش سعيدة لأن قلقي كان زيادة عن الطبيعي وكنت تايهة وبدورعلى المعنى معنى الحياة نفسها وسبب كل قلق حسيته .. علشان كدة كان هدفي ولادي يكونوا أكثر استقرارا وبالتالي أكثر ثقة وسعادة

 

لو مهتم تسمع تجربتي الخاصة في التعامل تحديدا مع سمعان الكلام او طاعة الأبناء بناد الشخصية

اظن بعد ما البنات دخلوا الجامعة والولاد ع الطريق تجربتي ممكن تكون مفيدة

اسمعني في بودكاست يوميات واحدة ست على موقع الميزان او ابل بودكاست .

 

 

أهالي ابهات امهات كتير قوي تسمعها تقولك ابني مابيسمعش الكلام او العيال مطلعين يعني ولو عكست السؤال وسألت الولاد حتلاقي منهم اللي حيشتكوا من اليوم اللي عرفوا أهاليهم فيه

 

واحدة من بناتي  كان عندها السنة اللي فاتت بروجكت مطلوب في المدرسة  وطلبت من اخواتها عمر ١٥ سنة وريان ١١ سنة ساعتها يشاركوا ويصوروا معاها مع اولاد تانين بنتي كانت بتسأل عن الخناقات او المشاكل اللي بينهم وبين مامتهم أنا كنت بعمل رياضة بعيد عنهم وسمعاهم ماشاء الله بيسترسلوا في الشكوى مني بثقة

الفيديو طلع مضحك جدا اتفرجت عليه قدامهم واتسلم للمدرسة

ملخص اللي اتقال مامي مش عايزانا نلعب بلاي ستيشن طول اليوم … مامي بتقلق لو مذاكرناش

وعلى بديهية اللي هما بيقولوه واللي بيثب برائتي اللي أسعدني حاجة تانية خالص بعيدا عن الإجابات

 

انهم مخافوش مني طبعا وانهم ماتكسفوش يعبروا بصدق عن نفسهم واللي ممكن يبقى مضايقهم مني قدامي ويسجلوا دا صوت وصورة الحالة الشجاعة الواثقة المستقرة الطبيعية دي هي اللي فرحتني بسواء علاقتنا ببعض

 

طبعا البلاي ستيشن الكتير في ظل سنة ونص بنحضر المدرسة اونلاين ومعاها قلق من عدم المذاكرة هي نقط اكتر من منطقية بس مش موضوعنا بالتحديد خاصة اني عمري ما غصبت على حد فيهم يذاكر لسبب بسيط جدا .. مفيش ف المذاكرة غصب انا كنت طالبة وبذاكر ولغاية دلوقت بقرأ وبتعلم ومدركة كويس اني ممكن اجبر طفل يقعد ع المكتب ويمسك في ايده كتاب بس مستحيل اجبر عقله انه يقرر يجتهد ويحاول ويعمل اللي عليه عشان كدة بندهش جدا لما بلاقي اهل بيتخانقوا مع ولادهم علي المذاكرة وبسأل نفسي هي الأهالي دي ذاكروا قبل كدة ولا ناسيين ولا بيستعبطوا

 

 

موضوع تربية الأطفال دا كبير جدا وخطر ومحتاج برنامج لوحده من عشرات الحلقات لكن هنا حشارك معاكم اطار عام ممكن من خلاله تنطلقوا انتوا بقى في البحث

 

الإطار دا له محددات عامة من وجهة نظري ممكن الخصها

 

١/ مفيش طفل بيتعلم حاجة صح علشان انا قلتله انها صح لازم أكون انا بعملها وبرفض عكسها بتصرفاتي دا بشكل عام

يعني عايزة ابني او بنتي يكون مسئول وانا بمد ايدي ومبعلمش نفسي ومعنديش هوايات ومعنديش اهتمامات وقاعدة طول النهار بتفرج علي المسلسلات التركي واقزقز لب لكن عايزاه يعرف قيمة المعاناة والجهد لما يكبر يبقى انتي او انت اكيد ماتسمعونيش دلوقت

 

٢/ الطفل حيكبر ويبقى انسان مستقل ومسئول عن نفسه وبنفضل نعاني مع ناس مابتعرفش تقول لأ وندي محاضرات ومواعظ ونصايح عن رسم الحدود والمساحة الخاصة وازاي الانسان لا يتم استغلاله وبننسي ان التربية القمعية واننا كنا بنتفنن في قهره عشان يسمع الكلام اللي هو كلامنا وهو صغير كانت سبب مهم عشان كدة بنلاقي مشكلة متكررة في عدم قدرة الشباب على الرفض ودي واضحة اكتر عند البنات لإن تربيتهم بيكون فيها قهر وقمع اكبر من الولد وانا اتكلمت عن دا في حلقة المساحة الخاصة وازاي ان قمع البنت بيكون سبب في عدم قدرتها لما تكبر على حماية نفسها .. لو مسمعتوهاش انا بقول لأ مهمة بصراحة

 

٣/ ابنك مش انت وبنتك مش انتي ولا والولاد امتدادك ولا ملكك ولا نسخة عنك ولا صورة منك ولا المفروض يكبروا علشان احنا الاهل نفخر بيهم ولا المفروض نموت احنا علشان هما يكبروا.

 

يبقى الحياة اللي ولادنا بيعيشوها والناس اللي بيعاشروهم هم اصل التصرفات والسلوكيات اللي بيتعلموها مش بالكلام والشعارات وعدم سمعان الكلام له جانب مفيد أحيانا وهو ان لادنا يتعلموا يرفضوا أي حاجة او أي انسان  او أي وضع ميكونش لصالحهم وانهم شخصيات مستقلة لازم تخالف توقعاتنا لان دا اصل الحياة والمتوقع

 

بالتالي لو راجعت التلات محددات اللي انا قلتهم دول وفكرت فيهم كويس حتلاقي في تصرفات كتير كنت بتعملها او بتعمليها دلوقت حتقتنع انها غلط

 

 

لو اتكلمت عن السن الصغير مع عودة المدارس واتفاقنا على ان الفترة العمرية الأولى هي اللي بتشكل شخصية أولادنا تعالوا نتكلم في منهج التربية العام شوية حاجات مع المحددات اللي ف الاول ل ركزنا فيها وقلبناها في عقلنا حنطلع احنا بطريقة إيجابية للتربية – بتسمعوا عن التربية بالطريقة الإيجابية – مصطلح جديد زي عادة الاختراعات والمسميات بدل ما يقولولك ان العنف غلط وجريمة والضرب عنف والصريخ والتخويف عنف وجرايم قالولك لا احنا نقول للناس ان في طريقة تربية اسمها التربية الإيجابية باعتبار ان التربية السلبية مش جريمة يمك علشان الناس تتقبل التغيير لكن انا من أصحاب التغيير بالصدمة الحقيقة دا أسلوب برده

لما تضرب ابنك لازم تعرف انك مجرم وانك حتطلع شخص جبان وعاجز ومتقوليش كلنا اضربنا لما تضرب وانت كبير ف ثانوي او جامعة ممكن تطفش تزهق البنت تتجوز اول عريس تكره الرجالة الخ لكن دا غير لما تضرب وانت عندك ٣ سنين و تتحبس ف اوضة الفران وتتلسع بالنار وتتحدف بحاجات حادة ويتصرخ فيك وتتشتم باوصاف والفاظ توصمك العمر كله

وكل ما سبق واكتر جرايم بيرتكبها أهالي كتير قوي ف حق ولادهم بس منجرحش مشاعرهم ونقولهم دي جريمة .. ماشي

 

المهم

نرجع مرجوعنا الطفل الصغير اللي بقول انه مجنني من عدوانية تخريب شقاوة زايدة دي التربية الإيجابية يا ستي بتقولنا ايه في الطفل المخرب او الشقي

 

واحد ان التصرفات الغلط دي اعراض مش هي الظاهرة الأساسية يعني الطفل دا ممكن يبقي خايف جعان مش نضيف محتاج اهتمام عايز يقول حاجة ومش عارف يعبر عنها كويس ممكن يبقي عنده حاجة عضوية ما يعني لو طفل عنده مشكلة ف سمعه الكلام بتاعه لو حتى حلقه ملتهب حيتصرف بطريقة يحاول بيها انه يلفت لمشكلته مينفعش يبقي طفل صغير بيعمل تصرفات فوضوية ومابيسمعش كلامي أقوم انا مفكرش في الأسباب اللي بتخليه يعمل دا

 

الحب هو اكتر حاجة الأطفال الصغيرين بيحتاجوها هي اللي بتكمل وتجبر كل المشاعر الناقصة او السلبية بتخليهم حاضرين ودا اللي الطفل بيدور عليه انه يحس انه متشاف من اهله

 

يبقى مفيش تصرف غلط اتعامل معاه بسطحية بدل ما اتعامل معاه كإنذار لحاجة غلط بتحصل

 

تاني حاجة اني افهم دوري كويس كأب ودوري كأم ايه دورنا كاباء وامهات

ازاي اخلي ابني متعاون بيسمع الكلام اللي بقولهوله وهو صغير علشان انا خايفة عليه مش مجرد يعتاد طاعة الأوامر من غير ما يفكر او يتدرب على تشغيل عقله وياخد قرار في اللي بيتقاله وبالتالي يكبر ويطلع ضمن قطيع بنشوفهم في المجتمع ونكره وجودهم ضعيف أي حد يقوله كلمة يسمعها أي حد ممكن يكون له عليه سلطة رجل دين .. مدير .. صديق مراتهولو بنت جوزها صاحبتها أصدقاء السوء الخ من اللي بنشوفه

نعمل ايه نطلب من الطفل الحاجة واحنا بنشرحله السبب لو انت افتكرت لما قللك ابنك مش ملكك ولا امتدادك حتفه حق الأولاد علينا واحنا بنقوله أي طلب حتى وهو صغير اغسل ايديك علشان ميبقاش فيه مايكروب يمرضك لم لعبك بعد ما تخلص علشان اللعب ما تتكسرش حتضيع لو دوست عليها حتتعور لو مامتك داست عليها كلكنا حنتعور ازاي يستخدم اللغة مش ايده ازاي يخطط لانك الحاجة الوحشة متحصلوش ويتفهم العواقب الخ

 

مش نأمر بقى ابنا او بنتنا بطريقة جافة وقاسية ولو ناقش نقوله انا ابوك متسألش ليه؟ انا امك تسع كلامي يا ستي انتي امه وهو ابوه بس حضراتكم بتربو ولادكم على الطاعة العمياء لمجرد كونكم اهله وبصرف النظر عن ان وارد تغلطه وانكم مش منزهين ولا معصموين فالأسلوب دا بيربي انسان ضعيف مقهور منسحق ميعرفش يقول لا لانه اتعود على الطاعة العمياء مكسور مش قادر يفتح بقه بدون تفكير وطبعا مينفعش وانت بتأسس شخصية ابنك او بنتك تقوله اسمع كلامي انا ولما تكبر ابقى شغل عقلك ومتخليش حد يضحك عليك انت كدة بتعطله وبتخرب حياته وبتعيق انطلاقه وبتطلعه ممسوح الشخصية ويا عالم حيكون قادر يتخطى الغلط اللي زرعتوه داخله ولا لأ   وياخد وقت وجهد يصلحه ولا حيضيع ويستغل ويتوجع علشان مش عارف يقول لأ بسبب حضراتكم وتربيتكم ونرجسيتكم

انت مرشد معلم صاحب مش مدير على ولادك مش ناظرة على بناتك

 

لازم اساعد بنتي و ابني واعلمه ياخد قراره يقرر ويتعلم يفكر ويختار انا بفهم عنك جملة مينفعش تتقال لازم اعتمد علي تفسير الحاجات عشان هو يعتاد انه يفسر أي حاجة يتعرضلها

ولادي لما كانوا صغيرين كانوا أحيانا ميرضوش يلبسوا الجاكت وهما نازلين في جو برد – دا مثال –  افضل اقنع واحذر وطبعا دا بياخد وقت وجهد حتبرد حتمرض مش تقدر تروح المدرسة حتغيب عن التمرين مش حتخرج مع اصحابك الخ طيب ايه اللي مضايقك في الجاكت مكلكع نشوف غيره لونه نغيره غالبا بعد المناقشة بيلبس لكن لو صمم سيبه وحصل مع بنتي الكبيرة وهي صغيرة وتعبت ومكرتهاش ولا عارضتني في موضوع اللبس دا خالص مع ابني الصغير كان عنيد اكتر فسيبته يعيا تلات مرات ولا حاجة واتعلم درس عمره وقيس على دا في كل المعاملات حتى المذاكرة

حتقولي يا قلبك !

حقولك ياقلبك وانت بتطلعهم قطيع مكسورة يا قلبك وانت بتحرمهم من أدوات السعادة …يا قلبك وانت علشان تريح دماغك وماتتعبش في المناهدة والمناقشة وعلشان ترضي نرجسيتك كوصي وصاحب سلطة بتخرسهم وتقولهم هو كدة وتمحي شخصيتهم

لما مرضيش يذاكر فاتلام وكان شكله وحش  وجاب درجات وحشة دي نتيجة اهماله وانه معملش اللي عليه .. طبعا دا في حال التقصير عن عمد مش في حال ان قدراته كدة دا وضع تاني لازم نبقى واخدين بالنا كويس ونفرق بين قدرة الطفل العقلية على اداد الواجب وبين دلعه واهماله

 

اذا هو مش ولد او بنت وحش وحلو او كويس انا عايزاه يعرف انه قادر يتصرف صح او يتصرف غلط .قادر يعمل حاجة كويسة وقادر يعمل حاجة وحشة وبالمرة يكبر ويبقى عاقل مش سطحي وماشي يقسم ويصنف الناس لفريقين اشرار وطيبين ويبقى كل ما يحصل عليه في حياته هو نتيجة طيبة او شر الآخر انما هو لا إرادة ولا فعل

.

 

تالت حاجة ولا معرفش احنا في الكام اني احترم ولادي احترم الانسان اللي هو ابني او بنتي ودا بيجي من قناعتي اني لا امتلكه وانه مش شيئ انه انسان مسئوليتي اهيئه لان الناس تحترمه ويحترمهم

الاحترام المتبادل بيني وبين اولادي دا الأصل و طبيعة الأمور عند ه خصوصية عنده تفضيلات عنده مزاج عنده حقوق  ابني او بنتي يستحق الاحترام ازعقله او اشتمه او اوصفه بصفات عاجزة اشككه ف نفسه

ينفع يقولي مليش مزاج اذاكرويجرب وينفع يقولي مبحبش اروح المكان الفلاني كفسحة واناقشه ونفكر ونجرب ومنجبروش

 

بس ازاي انت كدة حتخلي الولاد يتحكموا فينا

اطلاقا

لو قدرت وقدرتي تبني ثقة بينك بين ولادك حيسمعوا كلامك عن اختيار وحيفكروا ف الكلام قبل ما ينفذوه

والثقة دي بتتبني بالصدق ولا غير الصدق ومقصدش هنا اني أقول الحقيقة ومتقولش بابا ف الحمام ولا ماما معاها تلفون لاااا خلينا اعمق من كدة واكثر صدقا بمعنى اني اني أكون زي ما بقوله يكون او على الأقل بحاول

 

 

عايزهم يبقوا بياكلوا اكل صحي اكل اكل صحي يلعبوا رياضة العب رياضة حتى لو ملعبوش دلوقت لما يشوفوا انها أساس وضرورة حيعملوها حتى لو ملتزموش بالاكل اللي انا باكله بسس حيكون جزء من ثقافتهم وحياتهم

 

عايزة اعلمه الجدية لازم أكون بجتهد في حياتي وعندي اهداف وصعاب بواجهها وبشاركه فيها

عايزه يقتنع ان التعلم عملية مستمرة يبقى اكيد انا بعلم نفسي حاجة جديدة كل فترة لغة غسيل مواعيين طبخ زراعة منزلية الخ

 

الاقناع دوق الطعم دا لو معجبكش متاكلش فلما يدوق ومايعجبوش أقوله لا حتاكل بقى

 

لو اتسالت عن حاجة وانا معرفش أقول معرفش ادور ابحث اعلمه ان التعلم حاجة مستمرة اني حفضل الجا لمصادر معلومات موثوقة اني اتاكد قبل ما اهري

 

باختصار ولادنا جزء من رحلتنا واحنا جزء اساسي في رحلتهم او صلح اختصرنا عليهم وجع وتعثر ولخبطة كتير وعلشان يصلح لازم تشك ف نفسك وتطورها وتنضج بينما بترعاه