للأسف الناس الى اتربت على الخوف
الى اتربت على النقد و التوبيخ المستمر
الى اتربت انها لازم علطول تكون مثالية لاتخطئ محدش بيراعى انها ممكن بتغلط و تقصّر و تضعف
الناس دول اتعودوا على الكذب
عملت كذا ؟ …لا معملتش
قلت كذا؟ …لا ماقلتش
رحت المكان الفلانى ؟ …لأ مارحتش
قابلت فلان ؟….لا ماقابلتش
اتعودوا انهم يهربوا من الإحساس بالاحراج بالكذب
اتعودوا انهم يهربوا من الإحساس بالذنب بالكذب
بيهربوا من ألم اللوم بالكذب
ساعات زى ما بيقولوا بيبقى كذب أبيض مش هيضر حد بس هيحفظ ماء الوجه و هيمنع عنه ألم اللوم و التوبيخ و النقد و الاحراج
مشكلة هذا النوع من الكذب انه بيسبب ألم اكتر من ألم المواجهة مع الوقت
و خاصّة لو اتكشف و اتعرف انك كاذب
الى اتعود انه يدارى عمايله سواء كانت غلط او تقصير او ضعف بالكذب
و بيريح نفسه بكدة
بيتعب اوى من جواه مع نفسه و مع الناس في علاقاته
اللجوء الى هذا الأسلوب بيخليك رافض من جواك للتقصير او الضعف او الغلط الى انت ارتكبته
و بتحاول تداريه حتى عن نفسك بالانكار و التجاهل و الكبت
و دا دليل على انك مش قابل نفسك
مش قادر تعترف انك زى كل الناس بتغلط و تضعف و تقصّر
ودا بيخليك دايما مكسوف من نفسك انك بتغلط
و مكسوف كمان انك بتكذب علشان تدارى
يعنى بيبقى الألم مضاعف …ألم الذنب و ألم الكذب
انت فاكر ان الكذب كمان هيحميك من لوم الآخرين
لكن الكذب مع الوقت بيخلى الناس الى حواليك يفقدوا الثقة فيك و في كلامك
حتى لو قلت الصدق فانت مشكوك فيك الى ان يثبت صدقك و ليس العكس
خليك صريح مع نفسك وواجهها
ايوة انا انسان خطّاء زى كل الناس
أيوة أنا أخطأت و دا مش عيب
ايوة معملتش كذا أو عملت كذا
لو قدرت تعمل كدة بينك و بين نفسك دا هيساعدك جدا على قبول نفسك
هتحس أحيانا بالألم بلا شك
بس الألم دا مفيد للتعافى …التعافى من الغلط او الذنب
فيه قدر صحى من الكسوف من نفسك و الإحساس بالذنب …تقبّل مشاعرك دى و ماتهربش منها
دا هيساعدك انك تصلح غلطك و تعوض تقصيرك او تمتنع عن تكرارالغلط
دى مرحلة أولى مهمة الاعتراف بينك و بين نفسك
المرحلة التانية انك تعترف أدام الناس لو اتسألت
ايوة انا عملت كذا
و تكون من الشجاعة انك تعترف
و تتقبل النقد او اللوم او التوبيخ …هتحس بالألم مؤكد …تقبّل مشاعرك
لكن الألم دا أفضل ميت مرة من ألم فقدان الثقة فيك و التشكك الدائم في كل ماتقول
شجاعتك في الاعتراف بالغلط بتريح احساسك بالألم مع الوقت
و بتديك ثقة في نفسك
و حتى بتدى الاخرين ثقة فيك
و أفضل ميت مرة من اللجوء الى الكذب
أفضل لصحتك النفسية و أفضل لصحة علاقاتك
اكتشف أولا متى تكذب ؟ و لماذا تكذب ؟ و انت خايف من ايه بالظبط ؟ و اعترف
ثم قرر مع نفسك انك مش هتكذب تانى
اتعود انك تعترف باخطائك أولا بينك و بين نفسك في البداية …و مع الاعتراف حط خطوات لعدم تكرار الغلط
و لو واجهت خوفك و عملتها مرة هتتعود على الصراحة و الوضوح مع نفسك
و دا هيساعدك كتير انك تبقى حقيقى كمان أدام الناس
و هتلاقى نفسك ممكن تعترف بما ارتكبت من غير تردد و هتتحمل كامل المسئولية عن غلطك دا
الانسان الناضج انسان حقيقى لايكذب
انسان شجاع يتحمل مسئولية أخطائه و مسئولية إصلاحها
لا يكذب و لا يتجمل
#رحلة_نضج
#دعاء_راجح
