من الحاجات الى بتساعدك على فهم نفسك اكتشاف قيمك
كل واحد فينا عنده مجموعة من القيم تعتبر الأهم بالنسبة ليه
و الأهم بالنسبالك لايعنى انها بنفس الأهمية بالنسبة لحد تانى
فيه واحد مثلا قيمة ( النظام ) عنده عالية اوى في حين انها قيمة مش مهمة في حياة واحد تانى
فيه واحد عنده قيمة ( الحب ) أولوية في حين انها قيمة ليست في أولويات واحد تانى
كل ما هتتعرف على القيم المهمة في حياتك هتعرف حاجات كتير عن نفسك
هتعرف الدافع بتاعك انت ليه بتهتم باشياء و مواضيع و مواقف معينة و لا تهتم بأخرى
هتفهم انت ليه بتتصرف بشكل معين و ليه بترفض حاجة معينة
هتفهم انت ليه حسيت بمشاعر مؤلمة في موقف معين عندما لم تتحقق القيم المهمة بتاعتك و موقف تانى عرفت تعديه لما الموضوع متعلق بقيمة ليست من أولوياتك
منظومة القيم بتاعتك بتلعب دور كبير اوى في تصرفاتك و اقوالك
كمان هتتعرف على أحد أسباب معاناتك في حياتك
لما تكون عندك قيمة مهمة جدا و حياتك ماشية عكس القيمة دى
لما يكون عندك قيمة ( الأمان ) مهمة و حياتك مليانة خوف
لما يكون عندك قيمة ( الفكاهة ) مهمة و حياتك ماشية جد أوى
لما يكون عندك قيمة ( الاستقلال ) مهمة اوى و حياتك مش متحقق فيها القيمة دى
لما الانسان يعيش حياته من غير مايعيش قيمه المهمة بيتعب جدا و ما بيقدرش يكون حقيقى
لما بتتعرف على قيمك المهمة ليك هتعرف جزء مهم من نفسك
ولما بتتعرف هل حياتك ماشية على قيمك والا لأ هتتعرف على جزء كبير من معاناتك
كمان لما بتتعرف على قيمك الأساسية دا هيساعدك انك تاخد قراراتك و تقول لأ
تاخد القرار الذى يتماشى مع قيمك و تقول لأ للحاجة التي لن تتماشى مع القيم دى
كلنا في مرحلة من حياتنا بنكون ماشيين وفقا لقيم المجتمع السائدة
او على القيم الى اتربينا عليها في صغرنا
وكل ما بنمشى في رحلة النضج كل ما بنحس ان فيه قيم أهم لينا من قيم الاسرة و المجتمع السائدة
حاول تتعرف على قيمك المهمة ليك
دا هيساعدك كتير في رحلة النضج
