>استخسار النوم
ده مش مرض نفسى ولكنها حالة بتصيب الشخص اللى يومه كله شغل ..لما يحس انه فى دوامة ..لما كل ايامه تبقى شبه بعضها رغم اختلاف التفاصيل.. الا ان المضمون واحد …يفكر الف مرة قبل ما ينام ..لانه لو استسلم للبتاع ده اللى اسمه النوم ..هيتنقل لليوم اللى بعده اتوماتيك. ..فيدخل فى الروتين …يفضل يسهر نفسه عشان ياخد اكبر قدر من الراحة المتعبة …اكبر قدر من اى حاجة مختلفة عن يومه ….الشخص ده بيكون لسة عنده طاقة انه يعيش يوم كمان فى نفس اليوم اللى بيخلص …يوم تانى بتفاصيل تانية …يعنى عايز اليوم يبقى 48 ساعة عشان يقتنع انه ينام …طب وينام ليه وهو لسة ناقصه حاجة ….فيبدأ يعمل زى اللى عايز يلحق السحور فى آخر خمس دقايق قبل الفجر …ياكل من كل حاجة قطمة ويشرب بوء شاى على بؤ مية ….لكن للأسف مش بيلحق الا الفتات ..عشان بعد ما يومه الروتينى بيخلص …بردو بيكون خلص يوم اى حد تانى …اى حد نفسه يكلمه بيكون نام …اى محل بيكون نفسه يروحه بيكون قفل …اى طريق عايز يمشى فيه بيكون فاضى …فبيضطر يأجل كل شىء إلى مالا نهاية …ويسهر مع موبايله ..الوحيد اللى مش بينام
كيف نأكل ما نحب ونخسر الوزن؟
17 hours قبل
